قتلِ خواب

سب خواب ہوں سچ یہ ضروری تو نہیں

کھو کر محبّت بھی ادھوری تو نہیں

ہاں، دو قدم ہی چل سکے اک ساتھ ہم

وہ اک سفر تھا زیست پوری تو نہیں

ارمانوں کی جن کرچیوں پر ہم چلے

کیوں داغ وہ اب تک ہیں یوں پاوں تلے

دل جل بجھا نہ راکھ میں کوئی شرر

یہ آگ پھر ایندھن بنا کیسے جلے

جب یاد کی شبنم ترے رخسار پر

چپکے سے آ جائے شبِ غم کے پہر

دھڑکن میں جب ہو اک کھٹک سی دم بدم

رخ موڑ کر تب ڈھونڈھنا روشن سحر

ان عقل کے پردوں کو آخر چیر کے

تہ خانے میں دل کے اگر پھر آ سکے

بھٹکی ہوئی ماہِ جنوں کی اک کرن

پسپا خرد جس سے ہو، نہ ہی دل رہے۔ 

-خلشؔ مخفی